भक्तपुर– भक्तपुर नगरपालिका अनुगमन समितिका संयोजक राजकृष्ण गोराको नेतृत्वमा नगरको कमलविनायकमा रहेको मिनीमार्ट र खाद्य पसलहरूको मंगलबार अनुगमन गरिएको छ ।

अनुगमनमा क्रममा लेबल नभएको सामानहरू धेरै भेटाएको संयोजक गोराले बताए । उनका अनुसार अनुगमनमा सर्वसुलभ उपभोक्ता सहकारी मिनी मार्टमा प्याकेजिङ सामानहरू खाद्य अनुज्ञा पत्र लिई लेबल राखी मात्र बिक्री वितरण गर्न र म्याद नाघेको सामानहरू जफत गरी नष्ट गरिएको छ ।

उनका अनुसार शिवम् ओम सप्लायर्सलाई प्याकेजिङ सामानहरू खाद्य अनुज्ञा पत्र लिई लेबल राखी मात्र बिक्रीवितरण गर्न, पसल नवीकरण गर्न, मूल्यसूची राख्न र सबै खाद्य अनुज्ञापत्र विना प्याकेजिङ सामानहरू सबै भएकाले तीन दिनभित्र नगरपालिका कार्यालयमा उपस्थित हुन निर्देशन दिइएको छ भने एस एण्ड एस स्टोरलाई नवीकरण गर्न, म्याद नाघेको सामानहरू दत्तात्रय खाद्य उद्योगको सोयाबोडी मस्यौरालगायत जफत गरिएको थियो ।

अनुगमनमा कार्यपालिका सदस्यहरू, जिल्ला प्रशासन कार्यालय, महानगरीय प्रहरी परिसरका प्रहरी, उद्योग वाणिज्य संघ, भक्तपुर घरेलु तथा साना उद्योग संघका प्रतिनिधिलगायतको सहभागिता रहेको थियो ।