काठमाडौं – बाहुबली स्टारर प्रभासले अभिनय गरेको फिल्म ‘साहो’ का कारण एक हप्ता पछि धकेलिएको फिल्म ‘हजार जुनीसम्म’ को प्रदर्शन पुरानै मितिमा हुने भएको छ ।

‘साहो’को रिलिज मिति १५ दिन पछाडि धकेलिएपछि नेपाली चलचित्र ‘हजार जुनीसम्म’ पहिले नै घोषणा गरेको मितिमा आउने भएको हो ।

अब यो फिल्म साउन ३० गते नै प्रदर्शन हुने भएको छ । पहिले निर्माण टिमले सम्पादनको काम नसकिएको भन्दै भदौ १३ लाई रिलिज मिति तोकेको थियो । यो मितिमा नेपाली फिल्म ‘कबड्डी ३’ र ‘मारुनी’ पनि रिलिज हुँदैछन् ।

मंगलबार सार्वजनिक गरिएका पोस्टरमा रिलिज मिति साउन ३० गते तोकिएको छ ।

फिल्ममा आर्यन सिग्देल, प्रियंका कार्की, स्वस्तिमा खड्का, सलोन बस्नेत, शिवहरि पौडेल, अखिलेश प्रधान, अनुभव रेग्मी, संचिता लुइँटेल लगायत कलाकारको अभिनय छ ।