पाल्पा– समाजमा बेलाबखत अनौठा र अपत्यारिला घटना सार्वजनिक भएको छ । एक महिलाको मृत्यु भएको ठानेर स्थानीयले अन्तिम संस्कारका लागि घाटमा लगेका थिए।

हिन्दु परम्परा अनुसार घाटमा अन्तिम संस्कार गर्नु अघि नदिमा डुवाउने र नुहाइदिने धार्मीक प्रचलन छ । सोही क्रममा ति महिला बोल्न कराउन थालेपछि उनको पुनः उपचार थालिएको छ ।

झाडापखालाको विरामी भएर अस्पताल भर्ना गरिएकी ति महिलामा मुटुको पनि समस्या देखिएको थियो । पाल्पा रैनादेवी गाँउपालिका–१, सिद्धेश्वरकी ३६ वर्षीया नर्मता ज्ञवालीलाई १० दिन सम्म उपचार गर्दा निको नभएपछि आफन्तले नै अस्पतालबाट घर लगेका थिए ।

तानसेनकै युनाइटेड मिशन अस्पतालवाट १० दिनसम्म उपचार पछि आफन्तकै आग्रहमा अस्पतालले सोमबार दिउँसो अक्सिजन लगाएर बिरामीलाई डिस्चार्ज गरेको थियो । अक्सिजन निकालेको आधा घण्टापछि बिरामीको ज्यान गएको ठानेर आफन्तले नर्मतालाई सिधै रिँडी घाट पुर्‍याएका थिए ।

आधा शरीर पानीमा डुबाएको केही समयपछि उनी चल्न र कराउन थालेपछि तत्कालै गुल्मीको रिँडी प्राथमिक स्वास्थ्य केन्द्र पुर्‍याइएको थियो । स्वास्थ्यकर्मीले धड्कन र नाडी चलेकाले थप उपचारका लागि अस्पताल लान सुझाव दिए ।

त्यसपछि सोमबार बेलुकी लुम्बिनी मेडिकल कलेज प्रभासमा भर्ना गरी नर्मताको उपचार भैरहेको छ । झाडापखालाकी बिरामी ज्ञवालीलाई मुटुको समस्या देखिएको थियो ।