नयाँ दिल्ली- भारत र भुटानबीच अन्तरदेशीय रेलमार्ग निर्माणको तयारी अघि बढेको छ । मुलुकको पूर्वोत्तर क्षेत्रमा कनेक्टिभिटी सुदृढ गर्नका लागि भारत सरकारले अघि सारेको परियोजनाअनुसार अन्तरदेशीय रेलमार्गको तयारी गरिएको हो ।

यसका लागि भारत सरकारले १२ अर्ब भारु लगानी गरेको भुटान लाइभले जनाएको छ । अन्तरदेशीय रेलमार्गले भुटानको सार्पाङमा रहेको गेलेफु र भारतको आसाम राज्यमा रहेको कोक्राझारलाई जोड्ने जनाइएको छ ।

५७.५ किलोमिटर लम्बाईको रेलमार्गको निर्माण सन् २०२६ सम्म सम्पन्न भइसक्ने अपेक्षा गरिएको छ । केही समयअघि भारतीय विदेशमन्त्री एस जयशंकरले यसबारे भुटान सरकारसँग थप छलफल भइरहेको जानकारी दिएका थिए ।

यस रेलमार्गको निर्माण भएको खण्डमा भुटानको पर्यटन र वाणिज्य क्षेत्रलाई टेवा पुग्ने अपेक्षा गरिएको छ । रेलमार्गको निर्माण सम्पन्न भए यसले भुटानको दक्षिणी क्षेत्रमा थप रेलमार्ग विस्तारका लागि बाटो खुल्ने जनाइएको छ ।