इस्लामावाद- पाकिस्तानको बलुचिस्तान प्रान्तमा ६ जना फुटबल खेलाडीको अपहरण भएको छ । बलुचिस्तान प्रान्तको डेरा बुग्ती क्षेत्रमा ६ जना फुटबल खेलाडी अपहरणमा परेका हुन् ।

सिबी क्षेत्रमा आयोजना हुन लागेको एक प्रतियोगितामा सहभागी हुनका लागि त्यसतर्फ जाने क्रममा उनीहरु अपहरणमा परेको पाकिस्तानबाट प्रकाशित हुने डन अखबारले जनाएको छ ।

उनीहरुलाई अज्ञात हतियारधारीको समूहले डेरा बुग्ती जिल्लाको कच्छी नहर क्षेत्रबाट अपहरण गरेको भारतीय समाचार संस्था एएनआईले जनाएको छ ।

प्रतियोगितामा सहभागी हुनका लागि २४ खेलाडी सिबीतर्फ जान लागेको बेलामा हतियारधारी गिरोहले उनीहरु चढेको गाडी रोकेर अपहरण गरेका थिए । अपहरणकारीले पछि १८ जनालाई छाडेको र बाँकी ६ जनालाई नियन्त्रणमा लिएको जनाइएको छ ।

पाकिस्तानका अन्तरिम आन्तरिक मामिलामन्त्री सर्फराज बुग्ती र बलुचिस्तान प्रान्तका गृहमन्त्री जुबैर अहमदले अपहरणमा परेका खेलाडीको खोजी गरी तत्काल रिहा गर्न सम्बन्धित सुरक्षा निकायलाई निर्देशन दिएका छन् ।