काठमाडौँ- क्रिप्टो कारोबारमा संलग्न एक जना पक्राउ परेका छन् ।

सामाजिक सञ्जाल फेसबुकको म्यासेन्जरमा सेलर ग्रुपमा आबद्ध भई बाइनान्समार्फत् क्रिप्टोकरेन्सी कारोबार गरेको आरोपमा प्रहरीले सिन्धुपाल्चोकको वलेफी घर भई हाल काठमाडौँको बूढानीलकण्ठ बस्दै आएका २७ वर्षीय पुरुषोत्तम कार्कीलाई पक्राउ गरेको हो ।

उनले विभिन्न व्यक्तिहरुको बाइनान्स आइडीमार्फत् ३७२६.९८ युएसडीटी बराबरको राखी सोही बाइनान्सबाट विभिन्न ब्यक्तिहरुको बैंक खातालगायत वालेटहरुमा रकम ट्रान्सफर गरी क्रिप्टो कारोबार गरेको भन्ने गोप्य सूचनाको आधारमा काठमाण्डौं उपत्यका अपराध अनुसन्धान कार्यालयको टोलीले पक्राउ गरेको हो ।

उनलाई नेपाल राष्ट्र बैंक ऐन, २०५८ अन्तर्गत कसुरमा आवश्यक अनुसन्धान एवं कारवाहीका लागि जिल्ला प्रहरी परिसर, टेकु पठाइएको प्रहरीले जनाएको छ ।