काठमाडौँ-नेपाल भ्रमणमा रहेका अमेरिकी सिनेटर क्रिस भान होलेनले शान्ति प्रक्रियाका विषयमा चासो व्यक्त गरेका छन् ।

आइतबार सिंहदरबारस्थित नेकपा एमालेको संसदीय दलको कार्यालयमा पार्टीका अध्यक्ष केपी शर्मा ओलीसँग भेटवार्ता गर्दै सिनेटर होलेनले नेपालको शान्ति प्रक्रिया कसरी अघि बढ्छ र निष्कर्षमा पुग्छ भन्ने विषयमा चासो व्यक्त गरेका हुन् ।

त्यस्तै, भेटवार्तामा दुई देशीय सम्बन्धलाई थप प्रगाढ बनाउने विषयमा कुराकानी भएको थियो । भेटवार्तापछि सिनेटर होलेनले अमेरिका र नेपालका नागरिकबीचको सम्बन्ध सुदृढ गर्ने विषयमा कुराकानी भएको थियो ।

त्यस्तै, एमाले उपाध्यक्ष सुवासचन्द्र नेम्वाङले दुई देशबीचको सम्बन्धको बिषयमा कुराकानी भएको र सिनेटरले नेपालको शान्ति प्रक्रियाका बारेमा जिज्ञासा राखेको जानकारी दिए । जवाफमा एमाले अध्यक्ष ओलीले अन्तर्राष्ट्रिय प्रतिबद्धता, सर्वोच्च अदालतको फैसला र पीडितमैत्री हुनेगरी शान्ति प्रक्रिया टुङ्गोमा पुग्ने बताएका थिए ।

भेटवार्तामा सिनेटरले एमसीसी कार्यान्वयनमा नेपाल अघि बढिरहेको अवस्थामा आफूहरु खुसी र सकारात्मक भएको बताएका थिए । अमेरिकी सिनेटको परराष्ट्र सम्बन्ध समिति र राज्य तथा वैदेशिक कार्य–सञ्चालनसम्बन्धी विनियोजन उपसमितिका सदस्य सिनेटर होलेन शुक्रबार नेपाल आएका थिए ।