सिद्धार्थनगर- रुपन्देहीको सिद्धार्थनगर नगरपालिकाले पर्यटकलाई स्वागत गर्न निर्माण गरेको गेटनजिकै फोहोरको डङ्गुर देखिन्छ ।

सिद्धार्थ गौतमबुद्धको जन्मभूमिमा प्रवेश गरेको अनुभूति दिलाइने भन्दै बनाइएको सिद्धार्थ राजमार्गमा अवस्थित गेटनजिकै अहिले नगरपालिकाले नै फोहोर व्यवस्थापन गर्ने गरेको छ । पर्यटकलाई लक्षित गरी प्रवेशद्वार बनाइएपनि अहिले नगरपालिका आफैँलै नगरको फोहोर गेटनजिकै फाल्दै आएको छ ।

अहिले दैनिक रुपमा सिद्धार्थनगरबाट उत्सर्जन भएको फोहोर नगरपालिकाले गेटनजिकै डण्डा नदीको किनारमा व्यवस्थापन गर्दै आएको छ । केही समयदेखि सिसाको टुक्रा संकलन केन्द्र बनेको सो क्षेत्र अहिले सिसासँगै फोहोरको डम्पिङ क्षेत्रसमेत बन्न पुगेको छ ।

भारत उत्तर प्रदेशको गोरखपुरबाट साथीहरुसँग घुम्न आएका प्रमिन्दर मंगलबार गेटको फोटो लिन भनेर गाडीबाट ओर्लेका थिए । तर फोहोरको दुर्गन्धका कारण उनी केही मिनेटमै गाडी चढे र भैरहवा लागे । पर्यटकले मनोरञ्जन गरुन् र सम्झनास्वरुप तस्वीर लिउन् भन्ने उद्देश्यले गेट बनाएपनि नगरपालिका आफैँ पर्यटक भगाउने रणनीतिमा लागेको भन्दै आलोचना समेत सुरु भएको छ ।

सिद्धार्थनगर नगरपालिकाले वर्षौँदेखि वडा नं १ स्थित डण्डा नदी किनारमा रहेको झण्डी बजार क्षेत्रमा फोहोर फाल्दै आएको थियो । फोहोरले स्थानीयबासिन्दा प्रभावित भएसँगै वडा नम्बर १ र २ का बासिन्दाले फोहोर बोक्ने गाडीको प्रवेशमा नै रोक लगाएर विरोध जनाएका थिए । यसअघि पनि स्थानीयले पटक पटक विरोध जनाएउँदै आएपनि विभिन्न सहमति गरी विगत ३ दशकयता नियमित रुपमा नगरको फोहोर सोही क्षेत्रमा व्यवस्थापन हुँदै आएको थियो ।

अहिले स्थानीयको विरोधसँगै नगरपालिकाले फोहोर डम्पिङ क्षेत्रको स्थान नै परिवर्तन गरेको छ ।

सिद्धार्थनगर नगरपालिकाका फोहोर व्यवस्थापन प्रमुख अधिकृत केशव पौडेलले पुरानो ठाउँमा स्थानीयले गरेको अवरोधका कारण साउन ४ गतेबाट सिद्धार्थ राजमार्गनजिक पर्यटकीय गेटको पश्चिमतर्फ नदी किनारमा फोहोर व्यवस्थापन गर्दै आएको बताए । अहिले नगर क्षेत्रबाट संकलन भएको फोहोर गेट नजिकैको क्षेत्रमा टयाक्टरमार्फत पठाउने, खाल्डोमा फोहार राखी सम्याउने र माटो पुर्ने गरी फोहोर व्यवस्थापन गरिरहेको बताए ।

सार्वजनिक जग्गा हो भन्ने सुन्नमा आएको डम्पिङ क्षेत्रमा गन्ध नआओस भन्नका लागि मट्टितेल, फिनेल र इमो झोल दैनिक रुपमा हाल्ने गरेको उनले बताए । पहिलाको ठाँउमा स्थानीयले अवरोध गरी फाल्न नदिएपछि अहिले यो क्षेत्रमा फोहोर व्यवस्थापन हुदै आएको अधिकृत पौडेलको भनाइ छ ।

पौडेलका अनुसार सिद्धार्थनगरमा दैनिक ३० टनको हराहारीमा फोहोर उत्सर्जन भई नगरपालिकाले करिब सय जना जनशक्ति लगाएर १२ वटा टयाक्टर, ठेला र कुचीकारहरुबाट फोहोर संकलन गर्ने गरेको छ ।

सिद्धार्थनगर नगरपालिका वडा नं १ का अध्यक्ष उज्जवल पोखरेलले गेटनजिकै को सो क्षेत्रमा पहिलादेखिनै सिसाको कवाड (फोहोर) संकलन हुँदै आएको र वातावरण नै प्रभावित बनेकोले पटक पटक हटाउने प्रयास गरेपनि नमानेपछि जरिवानास्वरुप नगरको फोहोर सोही क्षेत्रमा फाल्न दिएको बताए ।

वर्षौ देखि नगरको फोहोर वडा नं. १ मै फलिरहेको छ झण्डी बजार होस या पर्यटकीय गेट नजिकै । फोहोरको कारण स्थानीय नैडिहवा र हर्नैया क्षेत्रको नागरिकमा असर परेको क्षेत्रमा अहिले नगरपालिकाले स्वास्थ्य बीमाको लागि बजेट छुट्याएको बताए ।

गेटनजिकै रहेको निजी जग्गा लिजमा लिई सिसा कवाडको काम गर्दै आएका राम प्रसाद पन्तले नगरपालिकाले फालेको फोहोरको कारण काम गर्न सकिने अवस्था नभएकोले काम नै बन्द गरेको बताए ।