काठमाडौँ- स्कुटर चोरी गरेको आरोपमा प्रहरीले दुई जनालाई पक्राउ गरेको छ । प्रहरीले लाल बहादुर तामाङको बा ५६ प ६३५४ नम्बरको होण्डा कम्पनीको कालो डिओ स्कुटर चोरी गर्ने र चोरिएको स्कुटर खरिद गर्नेलाई पक्राउ गरेको हो ।

ललितपुरको एकान्तकुनास्थित यातायात कार्यालयअगाडि तामाङ शौचालय गएका बेला स्कुटर चोरी गरेको आरोपमा विजयकुमार थापालाई प्रहरीले पक्राउ गरेको हो ।

उनले तामाङलाई तपाई शौचालय गएर आउनु, स्कुटर हेरिदिन्छु भनी विश्वासमा लिएर उक्त स्कुटर, सोही स्कुटरको डिकीमा रहेको ब्लुबुक, नगद ३० हजार रुपैयाँ र नागरिकता चोरी गरेको प्रहरीले जनाएको छ ।

उनलाई बिहीबार काठमाडौँको गौशालाबाट प्रहरीले पक्राउ गरेको हो । त्यसैगरी, उक्त स्कुटर खरिद गरेको आरोपमा प्रहरीले सरोज शाहीलाई काठमाडौँको कोटेश्वरबाट पक्राउ गरिएको प्रहरीको भनाइ छ ।

उनीहरुलाई चोरीसम्बन्धी कसुरमा आवश्यक अनुसन्धान तथा कारबाहीको लागि जिल्ला प्रहरी परिसर जावलाखेल ललितपुरमा पठाइएको छ ।