काठमाडौँ– नेपाली खेलाडी सन्दीप लामिछाने आवद्ध सर्रे जगुवार्सले ग्लोवल टी– २० क्यानडामा दोस्रो जित निकालेको छ । गएराति भएको खेलमा सर्रेले मिसिसौगा प्यान्थर्सलाई ५५ रनले हराउँदा सन्दीपले उत्कृष्ट ३ विकेट लिएका थिए ।

जितपछि सर्रे तालिकाको तेस्रो स्थानमा उक्लिएको छ । सर्रेले पहिला ब्याटिङ गर्दै निर्धारित २० ओभरमा ६ विकेट गुमाएर १६४ रन बनाएको थियो । सर्रेका जतिन्द्र सिंहले ५७ रनको अर्धशतकीय पारि खेल्दा एलेक्स हेल्सले ३९ रन जोडेका थिए । यस्तै लिटन दासले २५ रन बनाए ।

मिसिसौगाका जोहर खानले ३ विकेट लिए । जसकरण सिंह र क्यामरन डेलपोर्टले एकएक विकेट हात पारे । १६५ रनको लक्ष्यसहित मैदान उत्रिएको मिसिसौगाले १७ ओभरमा सवै विकेट गुमाएर १०९ रनमात्रै बनाउन सक्यो । मिसिसौगालाई सस्तैतमा समेट्न सन्दीप र स्पेनसर जोनसनले तीन–तीन विकेट लिए ।

यस्तै म्याथ्यु फोर्डले २ विकेट लिँदा आयान खान र अमर खलिदले एक एक विकेट हात पारे । सन्दीपले क्यामरन डेलपोर्टलाई १२ ओभर ४ बलमा सर्वाधिक ३३ रन बनाएका बेला आउट गर्दै टिमलाई चौथो सफलता दिलाएका थिए ।

सोही ओभरको अन्तिम बलमा जेम्स निसमलाई खाता पनि खोल्न नदिइ पभेलियनको बाटो सन्दीपले देखाएका थिए ।

प्रतियोगितामा ६ टोलीको सहभागीता रहेको छ । प्रतियोगिताको फाइनल खेल अगस्ट ६ मा हुनेछ ।