काठमाडौं – अमेरिकी दूतावासले नेपाल–युएस एलम्नाइ नेटवर्क (नुसान)सँगको साझेदारीमा शुक्रबार रिजनल कनेक्टिभिटी (क्षेत्रीय सञ्‍जाल विस्तार) सम्बन्धी विचारगोष्ठी आयोजना गरेको छ ।

कार्यक्रमलाई सम्बोधन गर्दै नेपालका लागि अमेरिकी राजदूत र्‍यान्डी डब्लु. बेरीले भने, “अमेरिकी दूतावासले आफै छलफललाई निर्देशित गर्ने हिसाबले यस्ता कार्यक्रमलाई प्रायोजन गरेको होइन । यसको उद्देश्य त विचारको स्वतन्त्र आदानप्रदान र सम्बन्ध निर्माणलाई प्रोत्साहित गर्नु हो । नेपालले सामना गरिरहेका चुनौतीका लागि यसबाट अहिले र भविष्यमा समेत व्यवहारिक तथा स्वदेशी समाधान निस्कनेछन् भन्ने हामीले आशा लिएका छौँ ।’

कार्यक्रममा अमेरिकी सरकारका आदानप्रदान कार्यक्रमका पूर्व विद्यार्थी, सरकारी अधिकारी, विद्यार्थी, लगायत १२० जनाभन्दा बढी सहभागी थिए । कार्यक्रममा प्रस्तोताहरूले तथ्याङ्क संरक्षण तथा गोपनीयता ढाँचाको विकासका साथै नेपालको अनुपम अवस्थितिका कारण पर्यटन तथा जलविद्युत् विकासका निम्ति सिर्जित भौगोलिक लाभ लगायतका विविध विषयमा चर्चा गरेका थिए ।

अमेरिकी दूतावास तथा नुसानको साझेदारीमा विगत एक वर्षमा आयोजित कार्यक्रमहरूको शृङ्खलामा यो चौथो कार्यक्रम हो । यसअघि नुसानले पारदर्शिता तथा जवाफदेहिता, विपद् जोखिम न्यूनीकरण तथा उत्थानशीलता, र महिला उद्यमशीलता लगायतका विषयमा सम्मेलन आयोजना गरेको थियो ।