काठमाडौँ– गैरआवासीय नेपाली संघ एनआरएनए अमेरिकाको आगामी कार्यकालका लागि वर्तमान कार्यसमितिका सचिव अनुप खनालले युवा उपाध्यक्षमा उम्मेदवारी घोषणा गरेका छन् ।

उनले ‘युवाहरूको वृहत सहभागिता, संस्थाको दिगो सफलता’ भन्ने नारासहित उपाध्यक्षमा उम्मेदवारी घोषणा गरेका  हुन् ।

गैर आवासीय नेपालीका साझा चासो र सरोकारमा ठोस योजना सहित कार्यान्वयन गराउने क्षमता भएका खनालले गैर आवासीय नेपाली संघ अमेरिकालाई थप उचाइमा पुर्याउन आफूले उम्मेदवारी दिएको बताएका छन् । गफ गर्नलाई होइन काम गर्नलाई आफ्नो उम्मेदवारी रहेको उनको भनाइ छ ।

वर्तमान कार्यसमितिका सचिव खनालले आफ्नो कामको मुल्याकंन गर्न समस्त अमेरिकावासी नेपालीलाई आग्रह गरेका छन् । नेपाल र नेपाली समुदायको लागि निरन्तर सेवा गर्ने हुटहुटी कायमै रहेको जनाउँदै अबका दिनमा अझ सक्रियता सहित अगाडि बढ्न खोजेको उनको भनाइ छ ।