काठमाडौँ- एसिया कप क्रिकेट पाकिस्तान र श्रीलंकामा हुने निश्चितजस्तै भएको छ । यसअघि पाकिस्तानले आयोजना गर्ने एसिया कपमा भारतले सहभागी नहुने भनेपछि अन्यौल भएको थियो ।

भारतीय समाचार संस्था पीटीआईका अनुसार एसियन क्रिकेट काउन्सिल एसीसीले एसिया कप पाकिस्तान र श्रीलंका गर्ने लगभग निश्चित जस्तै भइसकेको छ ।

प्रतियोगिताका १३ मध्ये करिब पाँच खेल पाकिस्तानमा र बाँकी खेलहरू श्रीलंकामा आयोजना हुने अपेक्षा गरिएको छ । श्रीलंकामा हुने खेलमा भारत सहभागी हुनेछ ।

१ देखि १७ सेप्टेम्बरभित्र हुने प्रतियोगिताबारे एसीसीले केही दिनमै औपचारिक घोषणा गर्ने तयारी गरेको जनाइएको छ ।

प्रतियोगितामा नेपालसहित ६ टोली सहभागी हुने तय भएको छ । प्रतियोगिताको समूह ‘ए’ मा नेपाल, पाकिस्तान र भारत रहेका छन् भने समूह ‘बी’ मा श्रीलंका, अफगानिस्तान र बंगलादेश छन् ।