इस्लामावाद– सन् २००८ मा भारतको मुम्बई शहरमा भएको आक्रमणका मुख्य योजनाकार मानिने हफिज सइद पाकिस्तानमा पक्राउ परेका छन् ।

उनलाई पाकिस्तानको पञ्जाब प्रान्तस्थित गुजरनवाला शहरनजिकबाट पक्राउ गरिएको पाकिस्तानी अधिकारीले जनाएका छन् । अमेरिका, भारतसहितका मुलुकले आतंककारी समूहको सूचीमा राखेको लस्कर ए तैएबा समूहका नेता सइदलाई वित्तीय आतंकवादको अभियोगमा पक्राउ गरिएको पाकिस्तानी सञ्चारमाध्यमले उल्लेख गरेका छन् ।

उनीमाथि प्रतिबन्धित समूहलाई पैसा उपलब्ध गराएको अभियोग दर्ता गरिने छ । पाकिस्तानी प्रधानमन्त्री इमरान खानको अमेरिका भ्रमणको केही दिनअघि सइदलाई पक्राउ गरिएको हो । उनीमाथि अमेरिकाले १ करोड अमेरिकी डलर बराबरको इनाम राखेको छ । उनलाई पक्राउ गर्न भारतले पाकिस्तानसमक्ष दबाब दिँदै आएको थियो ।

यद्यपि पाकिस्तानले उक्त दबाब बेवास्ता गरी उनलाई पक्राउ गरेको थिएन । भारतले भने उनलाई पक्राउ गरेर मात्र नपुग्ने र उनलाई कारवाही भएको आश्वस्त पार्न आह्वान गरेको छ ।

सन् २००८ नोभेम्बर महिनामा १६६ जनाको ज्यान जानेगरी भारतको आर्थिक राजधानी मुम्बई शहरका विभिन्न स्थानमा भएका आतंककारी आक्रमणमा लस्कर ए तैएबाको संलग्नता रहेको र यसको मुख्य योजनाकार सइद रहेको भारतीय अधिकारीले बताउँदै आएका छन् । यद्यपि सइदले भने उक्त आरोप अस्वीकार गर्दै आएका छन् ।

पाकिस्तानले केही समयअघि पनि उनलाई नजरबन्दमा राखेको थियो । तर, उनीविरुद्ध पर्याप्त सबुत नपुगेको भन्दै केही समयलयत्तै उनलाई रिहा गरिएको थियो । पाकिस्तानी कदमको भारत र अमेरिकाले चर्को आलोचना गरेका थिए ।