काठमाडौं– स्वास्थ्यमन्त्री ब्लूम्बर्ग जनस्वास्थ्य पत्रकारिता पुरस्कारबाट वरिष्ठ स्वास्थ्य पत्रकार पदमराज जोशी सम्मानित भएका छन्।

विश्व धूम्रपानरहित दिवसको अवसरमा आज आयोजित एक विषेश समारोहमा स्वास्थ्य तथा जनसंख्यामन्त्री मोहनबहादुर बस्नेतले हेल्थ टुडेका प्रधानसम्पादक जोशीलाई उक्त पुरस्कार प्रदान गरेका हुन् ।

पुरस्कारको राशि नगद ५० हजार रुपैयाँसहित प्रमाणपत्र रहेको छ। स्वास्थ्य तथा जनसंख्या मन्त्रालयले गठन गरेको विज्ञ सम्मिलित निर्णायक मण्डलले सहभागी भएका स्वास्थ्य प्रकारहरूमध्ये सबैभन्दा बढी अंक ल्याएका पत्रकार जोशीको नाम पुरस्कारका लागि छनौट गरेको हो।

पत्रकार जोशीले सुर्तिजन्य पदार्थविरुद्ध जनचेतना विस्तार गर्न र नसर्ने रोगको संक्रमण न्यूनिकरणमा योगदान गरेको मूल्यांकनका आधारमा उनलाई ब्लूम्बर्ग जनस्वास्थ्य पत्रकारिता पुरस्कार प्रदान गरिएको हो।

उनी दुई दशकदेखि निरन्तर स्वास्थ्य पत्रकारितामा संलग्न छन्।