काठमाडौँ – राष्ट्रपति रामचन्द्र पौडेलले प्रजातन्त्रका सेनानी, जननायक बिपी कोइराला स्मृति ट्रष्टका संस्थापक तथा कोषाध्यक्ष पुरुषोत्तम बस्नेतको निधनप्रति दुःख व्यक्त गरेका छन्।

राष्ट्रपति पौडेलले शोक सन्देशमार्फत बस्नेनको आत्माको चीर शान्तिको कामना गर्दै शोक–सन्तप्त परिवारप्रति समवेदना व्यक्त गरेको ट्रष्टले जनाएको छ । सोलुखुम्बुमा जन्मेर नेपालको प्रजातान्त्रिक आन्दोलनमा जीवन समपर्ण गगरेका बस्नेत एक निष्ठावान र इमान्दार राजनीतिकर्मीका रुपमा परिचित भएका राष्ट्रपतिले उल्लेख गरेका छन् ।

विसं २०१७ मा जननिर्वाचित सरकारलाई अपदस्थ गरेर निरङ्कुश तानाशाही व्यवस्था लादिएपछि त्यसका विरुद्धमा कलिलै उमेरबाट बस्नेतले आफूलाई होमिएका थिए । लामो समयसँगै जेलमा सँगै बसेका दिनहरु सम्झँदै राष्ट्रपतिले गणतन्त्र सुदृढिकरण, प्रजातान्त्रिक मूल्यमान्यताको विकास र प्रेस स्वतन्त्रतालाई मूल मुद्दा बनाएर बस्नेतले संविधानसभामा गर्ने बहस स्मरणीय रहेको उल्लेख गरेका छन् ।

राष्ट्रपतिबाट प्राप्त शोक सन्देश आज स्व बस्नेतको परिवारजन समक्ष उनको निवास सिफल हाइटमा वाचन गरिएको थियो । उक्त सन्देश लिएर राष्ट्रपतिकी सुपुत्री अवज्ञा पौडेल र प्रेस सल्लाहकार किरण पोखरेलसहितका अन्य उच्च अधिकारीको उपस्थिती थियो ।