काठमाडौँ – नेपाली कांग्रेसको पदाधिकारी बैठकमा नीति अधिवेशनका साथै अन्य तीन एजेण्डामाथि छलफल भएको छ । आइतबार सभापति शेरबहादुर देउवा निवास धुम्बाराही बसेको बैठकमा पार्टीको नीति अधिवेशन, भ्रातृ संघसंस्थालाई पूर्णता र महाधिवेशन तथा सरकारको कामकारबाहीबारे छलफल भएको हो ।

बैठकमा सरकारमा पठाउने थप मन्त्रीबारे भने कुनै छलफल नभएको बैठकमा सहभागी एक पदाधिकारीले जानकारी दिए । कांग्रेसले ८ मन्त्री पाएको भए पनि अहिलेसम्म ५ मन्त्री मात्रै सरकारमा पठाएको छ।

नीति अधिवेशन गर्नेबारे छलफल भएपनि कहिले नीति अधिवेशन गर्ने भन्नेबारे सभापति देउवाले सबैसँग छलफल गरेपछि निर्णयमा पुगिने बताएका छन् । कांग्रेसले २०७८ मंसिरमा १४ औं महाधिवेशन गर्दा नीति छाडेर नेतृत्व महाधिवेशन मात्रै गरेको थियो। नीति अधिवेशन पछि गर्ने भने पनि अहिलेसम्म मिति तय हुन सकेको छैन।

बैठकमा सरकारका कामकारबाही थप जनमुखी बनाउने विषयमा पनि छलफल भएको बताएको छ ।यस्तै नेविसंघ र तरुण दलजस्ता भ्रातृ संघसंस्थालाई पूर्णता दिएर छिटो महाधिवेशन गर्नुपर्ने विषयमा पनि आवाज उठेको बैठकमा सहभागी एक नेताले बताए ।