काठमाडौँ – काठमाडौँको चन्द्रागिरि नगरपालिकामा लाग्ने मातातीर्थ मेलाको हजारौँ भक्तजनले अवलोकन गरेका छन् । चन्द्रागिरि नगरपालिका–६ मातातीर्थ मन्दिरमा पूजा गर्ने तथा कुण्डमा स्नान गर्ने भक्तजनको आज दिनभरि घुइँचो लागेको थियोे ।

प्रत्येक वर्ष वैशाख कृष्णपक्ष औँसीका दिन आमालाई सम्मान गरी मनाइने मातातीर्थ मन्दिरमा काठमाडौँ उपत्यकाभित्र र उपत्यकाबाहिरका भक्तजनको घुइँचो लागेको मातातीर्थ संरक्षण तथा विकास संस्थाका अध्यक्ष शान्त उदासले जानकारी दिए। आज एक दिन मात्र लाग्ने मातातीर्थको पाँच लाखदेखि सात लाखसम्म भक्तजनले मेला भरेको उनले बताए ।

मेला भर्न आएका भक्तजनले गए रातिदेखि आमाको सम्झनामा बत्ती बालेर रातभर जाग्राम बस्ने र आज बिहान आमाको प्रतिमा पूजा गरी मातातीर्थ कुण्डमा स्नान गरेका थिए । मातातीर्थ कुण्डमा दर्शन गरेमा आमा दिवङ्गत हुने छोराछोरीले आमालाई तिर्नुपर्ने ऋणबाट मुक्त हुने विश्वास रहेको छ ।

आमाको मुख हेर्ने पर्व आज देशभर आमालाई मीठा मीठा खानेकुरा खान दिई श्रद्धा भक्तिसाथ मनाइएको छ । शास्त्रमा पिताभन्दा पनि ठूली मानिएकी आमाप्रति श्रद्धा, भक्ति, सम्मान र आदर गर्ने तथा उहाँबाट शुभाशीर्वाद थाप्ने दिनका रूपमा यो पर्वलाई लिइने शास्त्रीय परम्परा छ ।

छोराछोरीले आज बिहानै उठी नुहाएर आमालाई नयाँ लुगा लगाउने र मीठामीठा–तागतिला खानेकुरा खान दिई आशीर्वाद थाप्ने चलन छ ।