काठमाडौं – आर्थिक शिथिलताका कारण कर्जा प्रवाह नबढ्दा नेपालका वाणिज्य बैंकहरूले मंसिर महिनाका लागि पनि ब्याजदर घटाएका छन् । कात्तिकमा ६.१८ प्रतिशत रहेको व्यक्तिगत मुद्दती निक्षेपतर्फको ब्याजदर ०.२२ प्रतिशतले घटेको हो ।

२० वाणिज्य बैंकले मुद्दती निक्षेपमा मंसिरका लागि औषत ६.१८ प्रतिशत ब्याजदर दिने भएका हुन् । कात्तिकमा पनि व्यक्तिगत मुद्दतीको ब्याजदर औषतमा ०.२१ प्रतिशतले घटेको थियो ।

राष्ट्रिय वाणिज्य बैंकले मुद्दती निक्षेपमा ०.२ प्रतिशत ब्याजदर बढाउँदा आठ बैंकले स्थिर राखेका छन्, ११ बैंकले घटाएका छन् । साधारण बचत खातातर्फ तीनवटा बैंकले कम ब्याजदर दिनेछन् ।

एकवर्षे व्यक्तिगत मुद्दती खातामा ११ बैंकले दिने ब्याजदर घटेको छ । संस्थागत मुद्दतीतर्फ १२ बैंकले औषतमा तीन प्रतिशतभन्दा बढी ब्याजदर कटौती गर्दै १२ वटा बैंकले ब्याजद घटाएका छन् ।

राष्ट्रिय वाणिज्य बैंकले ०.२ प्रतिशतले ब्याजदर बढाउँदै ५.८ बाट ६ प्रतिशत पुर्‍याएको छ । नेपाल एसबीआई, नेपाल बैंक लिमिटेड, इन्भेस्टमेन्ट मेगा, सानिमा, सिद्धार्थ, प्रभु, एभरेष्ट र हिमालयन बैंकले ब्याजदर स्थिर राखेका छन् ।

मासिक ब्याजदर घटाउने बैंकमा ग्लोबल आईएमई, कृषि विकास, कुमारी, लक्ष्मी सनराइज, सिटिजन्स, प्राइम, नबिल, स्टान्डर्ड चार्टर्ड, माछापुच्छ्रे, एनआईसी एसिया र एनएमबी छन् ।

कात्तिक महिनामा सानीमा बैंकले ब्याजदर बढाउँदा १० बैंकले घटाएका थिए । नौ बैंकको ब्याजदर स्थिर थियो ।