काठमाडौं– विदेशबाट आयात हुने तरकारीमा विषादी परीक्षण गर्ने निर्णय नै फिर्ता लिएर सरकारले जनस्वास्थ्यमा खेलवाड गरेको भन्दै नेपाल चिकित्सक संघले सरकारको ध्यानाकर्षण गराएको छ ।

संघले मंगलबार विज्ञप्ती जारी गर्दै नेपालीहरुले दैनिक प्रयोग गर्ने तरकारी तथा फलफूलको विषदी परीक्षण गर्ने निर्णयलाई कार्यान्वयन गर्नुको सट्टा मन्त्रिपरिषद्बाटै निर्णय फिर्ता लिनु जनस्वास्थ्य ऐन विपरित भएको जनाएको हो ।

जनस्वास्थ्य सेवा ऐन २०७५ मा उपभोग्य वस्तुको गुणस्तरका लागि उत्पादन, भण्डारण तथा विक्री वितरणलाई गुणस्तर र स्वस्थ बनाइने भनिएको छ । मानव स्वास्थ्यमा गम्भिर असर पुग्ने अत्यावश्यक सामाग्रीको गुणस्तर परीक्षणमा सरकार जिम्मेवार हुनुपर्नेमा विषादी परीक्षण गर्ने निर्णय नै फिर्ता लिइ जनताको विश्वास र आशामा सरकारले कुठाराघात गरेको संघको आरोप छ ।

विषादीयुक्त फलफूल तथा तरकारीको सेवनले मानव स्वास्थ्यमा अल्पकालीन र दीर्घकालीन असर पर्ने संघको विज्ञप्तिमा उल्लेख गरिएको छ ।

विषादीयुक्त तरकारी सेवनबाट मानिसमा मानसिक असन्तुलन, श्वासप्रश्वासमा समस्या, झाडापखाला, पिसावमा समस्या तथा छालामा तत्काल संक्रमण देखिन्छ ।

यस्तै नियमिरुपमा विषादी मिसाइएको तरकारी तथा फलफूल सेवन गर्दा मुटु, कलेजो, मिर्गौलामा गम्भिर असर पर्ने तथा क्यान्सर समेत हुनसक्ने संघको भनाइ छ ।

विषादीयुक्त फलफूल तथा तरकारीले बाँझोपन तथा प्रजनन स्वास्थ्य सम्बन्धी समस्याहरु समेत निम्त्याउने भन्दै नेपालीको स्वस्थ ई बाँच्न पाउने र गुणस्तयुक्त उपभोग्य वस्तुको सेवन गर्न पाउने अधिकारलाई सुनिश्चित गर्न संघले माग राखेको छ ।