काठमाडौँ– चीन लडाकु ड्रोन निर्यात गर्ने सबैभन्दा ठूलो मुलुक बन्न पुगेको छ । चीनले साउदी अरब, म्यान्मार, इराक, इथियोपियाजस्ता मुलुकलाई लडाकु ड्रोन निर्यात गर्दै अएको छ ।

पछिल्लो समय साउदी अरबले पनि यमनमा जारी युद्धका क्रममा चीनमा निर्मित ड्रोन प्रयोग गर्न थालेको कतारी टेलिभिजन च्यानल अल जजीराको अनलाइन संस्करणले जनाएको छ ।

त्यसैगरी इराकी सुरक्षा अधिकारीहरुले पनि आतंकवादी संगठन इस्लामिक स्टेटका लडाकुलाई निशाना बनाउन चिनियाँ ड्रोनको प्रयोग गर्ने गरेको जनाएका छन् ।

यसबाहेक म्यान्मारमा शासन गरिरहेको सैनिक सरकारले पनि विद्रोहीलाई निशाना बनाउन चीनमा निर्मित ड्रोनको प्रयोग गर्दै आएको छ ।

गृहयुद्ध झेलिरहेको अफ्रिकी मुलुक इथियोपियामा चिनियाँ ड्रोनको प्रयोग बढिरहेको अल जजीराले उल्लेख गरेको छ ।

यसैगरी, मोरक्को, इजिप्ट, अल्जेरिया, युएई, पाकिस्तान सर्बियाजस्ता मुलुकले पनि चिनियाँ ड्रोन खरिद गरेका छन् ।

विश्वव्यापी हतियारको तथ्यांक राख्ने स्टकहोल्म इन्टरनेशनल पिस रिसर्च इन्स्टिच्युट सिप्रीले पछिल्लो दशकमा चीनले १७ मुलुकलाई २ सय ८२ लडाकु ड्रोन निर्यात गरेको जनाएको छ । यसको तुलनामा अमेरिकाले सोही अवधिमा केबल १२ लडाकु ड्रोन अर्को देशलाई निर्यात गरेको छ ।

लडाकु ड्रोन निर्यातमा चीनले उछिनेपछि निगारानी गर्ने ड्रोनको निर्यातमा भने अमेरिका अझै शीर्ष स्थानमा रहेको सिप्रीले उल्लेख गरेको छ ।

चीनले हालसम्म कुनै सैनिक कारवाहीका क्रममा लडाकु ड्रोनको प्रयोग नगरेको भएपनि गत सेप्टेम्बर महिनामा ताइवानी जलक्षेत्र आसपास चीनले सैन्य अभ्यास गर्दा लडाकु ड्रोन तैनाथ गरेको थियो ।

अन्तर्राष्ट्रिय सैन्य विश्लेषकहरु भने कुनै पनि युद्धको अवस्थामा चीनले ठूलो सङ्ख्यामा ड्रोनको प्रयोग गर्ने बताउँछन् ।