काठमाडौँ- अमेरिकाले चिनियाँ जासुसी बेलुन आन्ध्र महासागरमा खसालेको छ । अमेरिकाको साउथ क्यारोलाइना राज्यको आकाशमा देखिएको बेलुनलाई आन्ध्र महासागरमा खसालिएको हो ।

उक्त बेलुनले उत्तर अमेरिकी क्षेत्रमा केही दिन बिताएको अमेरिकी रक्षा प्रशासन पेन्टागनका अधिकारीहरूले बताएका छन् । पेन्टागन स्रोतका अनुसार एफ–२२ विमानबाट क्षेप्यास्त्र प्रहार गरी उक्त बेलुन खसालिएको हो ।

अमेरिकी राष्ट्रपति जो बाइडेनको प्रशासनले चिनियाँ बेलुन खसालेकोमा पेन्टागनको प्रशंसा गरेको छ । यता चीनले भने अमेरिकाको यस कदमप्रति आफ्नो ‘कडा असन्तोष’ व्यक्त गर्दै ‘आवश्यक प्रतिक्रिया’ दिन सक्ने बताएको छ ।

बाइडेनले मेरिल्याण्ड राज्यमा पत्रकारहरूसँगको कुराकानीमा भने, “उनीहरूले यसलाई सफलतापूर्वक तल झारे । म यस कार्यमा सरिक हुने हाम्रा एभिएटर्सको प्रशंसा गर्छु ।’’

यता चीनले भने घटनालाई ‘स्पष्ट रूपमा अतिरञ्जित’ को संज्ञा दिएको छ ।

अमेरिकी अधिकारीहरूले अमेरिकी आकाशमा एउटा ठूलो चिनियाँ निगरानी बेलुन ट्र्याक गरिरहेको बताएपछि गत बिहीबार विवाद सुरु भएको थियो ।

घटनापछि अमेरिकी विदेशमन्त्री एन्टोनी ब्लिन्केनले अमेरिका र चीनबीच बढ्दो तनावलाई नियन्त्रण गर्न आयोजना गर्ने भनिएको बेइजिङको दुर्लभ भ्रमण रद्द गरेका छन् ।