काठमाडौँ- पश्चिमी निम्न चापीय प्रणाली आज नेपाल प्रवेश गर्ने सम्भावना रहेको छ।

आज साँझबाट सुदूरपश्चिम हुँदै प्रवेश गर्ने प्रणालीले राति सुदूरपश्चिम, कर्णाली, लुम्बिनी र गण्डकी प्रदेशमा आंशिकदेखि सामान्य बदली रहने सम्भावना रहेको मौसम पूर्वानुमान महाशाखाले जनाएको छ।

सुदूरपश्चिम, कर्णाली र गण्डकी प्रदेशका उच्च पहाडी तथा हिमाली भू-भागका थोरै स्थानहरूमा हल्का हिमपातको सम्भावना पनि रहेको छ। यो क्रम पर्सि बुधबारसम्म जारी रहने महाशाखाले आज बिहान निकालेको विज्ञप्तिमा उल्लेख गरिएको छ।

महाशाखाकाअनुसार भोलि लुम्बिनी प्रदेशका पहाडी भू-भागका एक-दुई स्थानमा हल्का वर्षाको सम्भावना रहेको छ भने पर्सि बुधबार राति भने प्रदेश १, मधेश प्रदेश, बागमती र गण्डकी प्रदेशमा आंशिकदेखि सामान्य बदलीको सम्भावना रहेको छ।

तराईलगायत देशभरका अधिकांश ठाउँमा बिहान साँझ हुस्सु र कुहिरो लाग्ने क्रम बढ्दो क्रममा रहेको छ।