बद्री पंगेनी ।

काठमाडौं – पछिल्लो समय संगीत क्षेत्रमा चोरीका समाचार सधैजसो सामान्य हुन थालेका छन् । केही वर्षयता लोकशैलीका गीतले संगीत क्षेत्र त कब्जा गरेका छन् । तर, नेपालमा सार्वजनिक गरिने लोकशैलीका गीतमध्ये धेरै गीत विदेशी या नेपाली गीतबाट चोरिएको भन्ने आरोप खेप्नुपरेको छ ।

पहिलेका तुलनामा छाडा गीत कम सार्वजनिक हुने गरे पनि अझै पनि संगीत क्षेत्र पूर्णत व्यवस्थित हुन सकेको छैन । संगीत क्षेत्रमा फास्टफुट जस्ता गीत निर्माणको बाढी आएको छ ।

यसैबीच चर्चित गायक तथा राष्ट्रिय लोक तथा दोहोरी गीत प्रतिष्ठान नेपालका अध्यक्ष बद्री पंगेनीले पछिल्लो समय संगीत क्षेत्र अस्तव्यस्त भएको बताएका छन् ।

खबरहबसँग कुराकानी गर्दै पंगेनीले भने, ‘संगीत क्षेत्र अहिले अस्त, व्यस्त र मस्त छ, यसलाई व्यवस्थित बनाउन हामी सबै लाग्नुपर्छ ।’

पछिल्लो समय संगीत क्षेत्रमा विकृति बढेको पनि उनले स्वीकारे । पंगेनीले संगीत क्षेत्रमा देखिएका विकृृतिलाई न्यूनीकरण गर्न राज्यले नै कदम चाल्नुपर्ने बताए ।

‘हामीले मात्र चाहेर सक्दैनौँ, संगीत क्षेत्रको व्यवस्थापनका लागि राज्यले पनि कदम चाल्नुपर्छ,’ उनले भने ।

पछिल्लो समय संगीत क्षेत्रमा संगीत चोरीको बहस सतहमा आएको छ । नयाँ कलाकारले पुराना कलाकारका गीतलाई मोडिफाई गरी नयाँ शैलीमा बजारमा ल्याउने गरेको पुराना सर्जकहरुले आरोप लगाउने गरेका छन् ।

केही दिनअघि प्रकाश सपूतको चर्चित गीत ‘गलबन्दी’ ले यस्तै आरोपको सामना गर्नुपरेको थियो ।