काठमाडौं – भदौ ६ देखि प्रदर्शनमा आउने फिल्म ‘हजार जुनीसम्म’ को एक गीतमा दीपाश्री निरौला र आर्यन सिग्देललाई रोमान्टिक मुडमा देखिने भएको छ । निर्माण टिमले गीत छायांकनका केही तस्वीर आउट गरेको छ ।

सार्वजनिक गरिएका तस्वीरमा दीपाश्री निरौला र आर्यन सिग्देलले रोमान्स गरेको देख्न सकिन्छ । यस्तै अर्का अभिनेता शिवहरि पौडेल पनि तस्वीरमा देखाइएको छ । गीतमा दीपाश्री निरौलाले शर्मिलाका रुपमा आफूलाई प्रस्तुत गर्नेछिन् । निर्माण टिमका अनुसार दीपाले भट्टीकी साहुनी का रुपमा भिडियोमा आफ्नो प्रस्तुति दिनेछिन् ।

यस्तै गीतको भिडियोमा नायिका स्वस्तिमा खड्का, नव–नायक अक्की प्रधान, कलाकार शिवहरि पौडेल, उत्तम केसी लगायतलाई पनि देख्न सकिनेछ । कविराज गहतराजले कोरियोग्राफी रहेको गीतमा पुरुषोत्तम प्रधानको छायांकन छ ।

‘आज नगद भोली उधारो’ बोलको गीतमा बसन्त सापकोटाको शब्द तथा संगीत, प्रल्हाद तिमिल्सिना, मिना निरौला र दीपाश्रीको स्वर सुन्न सकिनेछ ।

विकास राज आचार्यले निर्देशन गरेको यो फिल्ममा सामीप्यराज तिमल्सेनाको पटकथा छ । फिल्ममा संचिता लुइँटेल, अनुभव रेग्मी लगायतको पनि अभिनय रहनेछ ।