काठमाडौँ- पोखरामा आज यती एयरलाइन्सको विमान प्राविधिक कारणले दुर्घटनामा परेको भन्ने प्रारम्भिक जानकारी पाएको नेपाल नागरिक उड्डयन प्राधिकरणले जनाएको छ । दुर्घटनाअघि विमानमा आकाशमै आगोको झिल्को देखिएको समेत बताइएको छ ।

प्राधिकरणका सूचना अधिकारी ज्ञानेन्द्र भुलले आज विहान १०ः३३ बजे काठमाडौँ विमानस्थलबाट उडान भरेको सो विमान प्राविधिक कारणले दुर्घटनामा परेको प्रारम्भिक जानकारी प्राप्त गरेको जनाएका हुन् ।

“मौसमको समस्या थिएन, विमानको प्राविधिक कारणले दुर्घटना भएको प्रारम्भिक जानकारी प्राप्त भएको छ”, उनले भने, “विमानमा आकाशमै आगोको झिल्को देखिएको जानकारी प्राप्त भएको छ ।”

विमानमा चालक दलका चार जना र ६८ जना यात्रु सवार थिए । विमान वरिष्ठ क्याप्टेन कमल केसी र अञ्जु खतिवडाले उडाएका थिए ।

प्राधिकरणका अनुसार आठ जना विदेशी नागरिक र ६० जना नेपाली नागरिक थिए । जसमा ६२ जना वयस्क, तीन जना बालबालिका, तीन जना असक्त भएका व्यक्ति सवार थिए ।