काठमाडौं-१४ औ महाधिवेशनको कार्यतालिका बनाउने विषयमा सहमति भएपछि कांग्रेसको केन्द्रिय समिति बैठक आज (आइतबार)बाट शुरु भएको छ ।

करिब ४ घण्टा लामो पदाधिकारी बैठकपछि सभापति शेरबहादुर देउवा र वरिष्ठ नेता रामचन्द्र पौडेलकाबीचमा विधानअनुसार पार्टी संगठनको अन्तरिम व्यवस्थाअनुसार गठन गरेपछि महाधिवेशनको कार्यतालिका बनाउने विषयमा सहमति भएको हो ।

दुई नेताकाबीचमा भएको सहमतिअनुसार अन्तरिम व्यवस्थाको प्रयोग गरी पार्टीको स्थानीय तहदेखि निर्वाचन क्षेत्र हुँदै जिल्ला र प्रदेश तहको संरचना गठन हुनेछ । त्यसपछि महाविधेशनको मिति तोक्ने र त्यसका लागि काम थाल्ने सहमति भएको हो ।

कांग्रेसको महाविधेशन आगामी फागुनमा गर्नुपर्ने भएपनि सभापति देउवा पक्षका नेताहरुले विधानले दिएको व्यवस्थाको प्रयोग गर्दै डेढ वर्ष समय थप्ने तयारीमा छन् । त्यसकै विरोधस्वरुप महाविधेशनको तालिका समेत केन्द्रिय समितिमा पेश गर्नुपर्ने भन्दै वरिष्ठ नेता पौडेल समुहले विरोध गर्दै आएको थियो ।

दुई नेताका बिचमा सहमति भएपछि आइतबारको बैठकमा नियमावली संशोधन मस्यौदा समितिका संयोजक रमेश लेखकले ‘नेपाली कांग्रेसको नियमावली, २०७६’ प्रस्तुत गरेको कांग्रेसले जनाएको छ । नियमावलीको मस्यौदा केन्द्रीय कार्यसमितिका पदाधिकारी एवं सदस्यहरुलाई वितरण बैठक समापन भएको र नियमावलीको अध्ययनपछि असार २७ गते अर्को बैठक बस्ने मुख्यसचिव कृष्णप्रसाद पौडेलले जानकारी दिए ।