काठमाडौं – यस वर्षको प्रतीक्षित फिल्म ‘कबड्डी ३’ को टिजर सार्वजनिक गरिएको छ । भदौ १३ देखि प्रदर्शनमा आउन लागेको फिल्मको टिजर युट्युबमार्फत सार्वजनिक गरिएको हो ।

सिनेमा आर्टको प्रस्तुतिमा निर्माण भइरहेको फिल्म ‘कबड्डी कबड्डी कबड्डी’ को टिजरमा दयाहाङ राई र उपासना सिंह ठकुरीलाई देखाइएको छ । टिजरमा विजय बराल पनि अटाएका छन् ।

पहिलेका सिरिजमा जस्तै यो फिल्ममा पनि दयाहाङ राईले युवतीको माया पाउन गर्ने कसरतमा कथा उनिएको टिजरबाटै प्रष्ट हुन्छ ।

रामबाबु गुरुङले निर्देशन गरेको यो फिल्ममा दयाहाङ, विजय र उपासनाका अलावा रिश्मा गुरुङ, कर्मा, विल्सन विक्रम राई, बुद्धि तामाङ, विजय बराल, पुष्कर गुरुङ, माओत्से गुरुङ, कमलमणि नेपाल लगायतका कलाकारले समेत अभिनय गरेका छन् ।

फिल्ममा सुरेन्द्र पौडेलको सम्पादन, शैलेन्द्र डी. कार्कीको छायांकन र उपेन्द्र सुब्बा र निर्देशक गुरुङको स्किृप्ट देख्न सकिनेछ ।