काठमाडौँ– चिनियाँ स्मार्टमाफोन निर्माता कम्पनी सिओमीले धमाधम कर्मचारी कटौती गर्न थालेको छ । हङकङबाट प्रकाशन हुने साउथ चाइना मर्निङ पोस्टका अनुसार सिओमीले विभिन्न विभागमा कार्यरत कर्मचारीलाई कामबाट हटाउन थालेको हो ।

चिनियाँ श्रम कानूनअनुसार औपचारिक रुपमा २० जनाभन्दा धेरै कर्मचारीलाई हटाउँदा सरकारी निकायमा अनिवार्य जानकारी गराउनुपर्छ । सोही कारण ‘व्यापारिक अनुकूलता’ का नाममा सिओमीले कर्मचारी कटौती गरेको बताइएको छ ।

यसबारे जानकारी दिँदै उक्त कम्पनीका प्रतिनिधिले ‘नियमित व्यापारिक अनुकूलता र सांगठनिक सुव्यवस्था’ कार्यान्वयन गरेको र यसबाट केबल १० प्रतिशत कर्मचारी प्रभावित हुने बताएका छन् ।

सेप्टेम्बर ३० मा प्रकाशित सिओमीको पछिल्लो प्रतिवेदनअनुसार कम्पनीमा कूल ३५ हजार ३ सय १४ जना कर्मचारी कार्यरत छन् । यीमध्ये ३२ हजार कर्मचारी मुख्यभूमि चीनमा कार्यरत रहेको बताइएको छ ।

चिनियाँ समाचार संस्था जेमियानले जनाएअनुसार कम्पनीले स्मार्टफोन र इन्टरनेट सेवा व्यवसायका विभिन्न एकाईमा कर्मचारी कटौतीको तयारी गरिरहेको उल्लेख गरेको छ ।

कामबाट हटाइएका कर्मचारीलाई केही उपदानको समेत व्यवस्था समेत गरिएको साउथ चाइना मर्निङ पोस्टले जनाएको छ । कर्मचारी कटौतीपछि सिओमीको कर्मचारीलाई दिइने तलब खर्च १५ प्रतिशतले कमी आउने अपेक्षा गरिएको छ ।

कोरोना भाइरसको महामारीसँगै चीनमा लागू गरिएको कठोर शून्य कोभिड नीतिका कारण कम्पनीको बिक्री घटेको छ ।

यस कम्पनीले सन् २०२४ भित्र अमेरिकी प्रविधि कम्पनी एप्पललाई उछिनेर विश्वमै सबैभन्दा धेरै स्माटेफोन बिक्रेता बन्ने लक्ष्य लिएको छ ।