काठमाडौँ– एप्पलको आईफोन निर्माण गर्ने ताइवानी कम्पनी फक्सकनले चीनमा रहेका कारखानामा विभिन्न समस्या उत्पन्न भएपछि आफ्नो बिक्री ह्वात्तै घटेको जनाएको छ । सिंगापुरबाट प्रकाशित हुने स्ट्रेट टाइम्सका अनुसार फक्सकनले नोभेम्बर महिनामा आफ्नो बिक्रीमा ११ दशमलब ४ प्रतिशतको गिरावट आएको जनाएको हो ।

चीनको झेङ्जोउ सहरमा कोरोना भाइरसको प्रकोप देखिएसँगै चीनको शून्य कोभिड नीतिका कारण लकडाउन गरिएको र यसबाट बिक्री प्रभावित भएको जनाएको छ । उक्त सहरमा आईफोन उत्पादन एवम् जडान गर्ने फक्सकनको सबैभन्दा ठूलो कारखाना रहेको छ ।

कोरोना भाइरसको प्रकोप र त्यसपछिको लकडाउनका कारण उसैपनि उत्पादनमा गिरावट आइरहेका बेला आईफोन उत्पादन केन्द्रमा कामदारहरुले हिंसात्मक प्रदर्शन समेत गरेको स्ट्रेट टाइम्सले उल्लेख गरेको छ ।

यद्यपि हाल भने अवस्था पूर्ण रुपमा नियन्त्रणमा रहेको र आगामी दिनहरुमा आईफोनको उत्पादनमा सुधार आउने कम्पनीले दाबी गरेको छ ।