काठमाडौँ– अफगानिस्तानमा शासन गरिरहेको तालिबानले अधिकारका लागि प्रदर्शन गर्ने महिलामाथि दुर्व्यवहार गर्ने गरेको पाइएको छ ।

अन्तर्राष्ट्रिय मानव अधिकारवादी संस्था ह्युमन राइट्स वाचले आफ्नो अधिकारका लागि प्रदर्शन गर्ने महिलालाई तालिबानले परिवारसहित बन्धक बनाउने, उनीहरुमाथि शारीरिक, मानिसिक एवम् यौनजन्य दुर्व्यवहार गर्ने गरेको पाइएको जनाएको छ ।

ह्युमन राइट्स वाचले प्रतिवेदन प्रकाशित गर्दै यसबाहेक अफगानिस्तानमा आफ्नो अधिकारको माग गर्ने महिलाहरुलाई धम्की दिने, उनीहरुमाथि कुटपिट गर्ने, निकै कष्टकर अवस्थामा बन्धक बनउने जस्ता गतिविधि हुँदै आएको छ । बन्धक बनाइएका महिलालाई बाहिर निकाल्न पनि तालिबान उदासिन रहेको उक्त प्रतिवेदनलाई उद्धृत गर्दै भारतीय समाचार संस्था एएनआईले जनाएको छ ।

त्यस्तै, तालिबानले महिलासँगै बन्धक बनाइएका उनीहरुका पुरुष आफन्तहरुलाई करेन्ट लगाएर यातना दिने गरेको पनि जनाइएको छ ।