काठमाडौं – कमेडी जानरामा निर्माण भइरहेको फिल्म ‘कबड्डी कबड्डी कबड्डी’ आउँदो भदौ १३ मा रिलिज हुने भएको छ । निर्माण टिमले यो फिल्म भदौ १३ गते रिलिज गर्ने जनाएको हो ।

सोही मितिमा साम्राज्ञी राज्यलक्ष्मी शाह र पुष्प खड्काको शीर्ष भूमिका रहने फिल्म ‘मारुनी’ पनि रिलिज हुँदैछ । जुन फिल्मले यसअघि नै रिलिज मिति तय गरेको थियो ।

हालै छायांकन सकिएको फिल्म ‘कबड्डी ३’ मा अहिलेका चल्तीका कलाकारको अभिनय छ । फिल्ममा दयाहाङ राई सहित उपासना सिंह ठकुरीको समेत शीर्ष भूमिका हुनेछ । उपासनाले अनमोल केसी अभिनित फिल्म ‘क्याप्टेन’ बाट चर्चा पाएकी थिइन् । उपासना र दयाहाङ राईसँगै कर्मा, बुद्धि तामाङ, रिश्मा गुरुङ लगायतका कलाकारको अभिनय छ । फिल्म छायांकनदेखि नै चर्चामा छ ।

अर्कातिर यो फिल्मको हाइप अझ बढी हुने आँकलन गरिएको छ । किनकि, यसअघि नै यसका दुई भाग व्यावसायिक रुपमा सफल भइसकेका छन् ।

उपेन्द्र सुब्बा र रामबाबु गुरुङले लेखेका यो फिल्मलाई रामबाबु गुरुङले निर्देशन गर्नेछन् । यो फिल्म वर्षकै प्रतीक्षित फिल्ममध्ये एक हो ।