काठमाडौं– आइतबार मुलुकभर धान दिवस मनाइँयो । धान दिवसमा अवसरमा मन्त्री, नेता, मेयर उपमेयरदेखि कलाकारहरु धान रोपाइँमा सरिक भए । उनीहरुका तस्वीर सामाजिक सञ्जालमा छरपस्ट छन् ।

त्यो भन्दा अनौठो धान रोपाइ फेसबुकमा अहिले भाइरल भएको छ । त्यो हो– केटीको छातीमा र केटाको टाउकोमा गरिएको धान रोपाइ । यो रोपाइले सवैको ध्यान खिचेको पनि छ । चर्चासँगै आलोचना पनि उत्तिकै छ ।

यता, ललितपुरका सांसद नवराज सिलवालले हातमा पन्जा र खुट्टामा टलक्क टल्किने जुत्ता लगाएर गरेको धान रोपाईको पनि छुट्टै चर्चा छ ।

यस्तै, पूर्वप्रधानमन्त्री तथा समाजवादी पार्टीका अध्यक्ष डा. बाबुराम भट्टराईले पनि गृहजिल्ला गोरखामा धान रोपाइँ गरे । गोरखामा गोरु जोत्दै गरेको अवस्थामा भेटिएका डा.  भट्टराई पनि धान दिवसमा भाइरल बने । हात हलो समातेर शिरमा छत्रे टोपी लगाएका बाबुरामको धान रोपाइ पनि कसैको भन्दा कम रहेन ।

यता, चितवन नगरपालिकाकी मेयर तथा प्रचण्ड पुत्री रेणु दाहालले चितवनमा गरेका धान रोपाइले पनि विशेष चर्चा पायो । बाजागाजासहित उनी धान रोपाइमा सरिक भएकी थिइन् ।

त्यसो त हरेक वर्ष धान रोपाइमा अनेक किसिमका चर्चा चल्ने गरेका छन् । कहिले मन्त्रीले खेतमै महिलालाई गर्लम्म अंगालो मारेको विषय त कहिले गमलामा धान रोपेको विषयले चर्चा पाएको थियो ।