काठमाडौँ- फिफा विश्वकप हेर्नका लागि हिँडेरै आफ्नो मुलुकबाट कतार जाने क्रममा रहेका एक जना स्पेनी नागरिक इरानबाट बेपत्ता भएका छन् । उनलाई इरानमा पक्राउ गरिएको हुनसक्ने अन्तर्राष्ट्रिय सञ्चारमाध्यमले जनाएका छन् ।

तीन महिनाबाट विभिन्न १५ मुलुक हुँदै हिँडेरै कतार जाने क्रममा रहेका ४१ वर्षे स्पेनी नागरिक सान्टियागो सान्चेज इरानबाट बेपत्ता भएको समाचार संस्था एपीले जनाएको छ । स्पेनको विदेश मन्त्रालयले सान्चेज इरानमा पक्राउ परेको ‘९९ प्रतिशत सम्भावना’ रहेको जानकारी दिएको उनकी आमा सेलिया कोगेदोरले बताएकी छिन् ।

उनले अन्तर्राष्ट्रिय समाचार संस्था एपीलाई आफूहरु आशावादी भएको समेत बताइन् । उनी अक्टोबर २ मा इराकबाट इरान प्रवेश गरेसँगै सम्पर्कमा नआएको उनको परिवारले जनाएको छ ।

यता इरानको कुर्दिस्तान क्षेत्रका मानव अधिकार सञ्जालले उनी कुर्दिस सहर सानन्दाजस्थित गुप्तचर मन्त्रालयको बन्दीगृहमा रहेको जनाएको छ । द नेशनल अखबारका अनुसार उक्त बन्दीगृहबाट बाहिरिएका केही व्यक्तिहरुले त्यहाँ एक जना स्पेनी नागरिक पनि रहेको बताएका थिए ।

स्पेनको विदेश मन्त्रालयले सान्चेजको अवस्थाबारे इरानस्थित स्पेनी दूतावास इरानी अधिकारीहरुसँग सम्पर्कमा रहेको जनाएको छ ।