काठमाडौँ– अमेरिकामा दुई जना संदिग्ध चिनियाँ जासुसविरुद्ध अभियोग दर्ता गरिएको छ । अनुसन्धानकर्ताहरुलाई हजारौँ डलर रकम एवम् गहना दिएर चिनियाँ प्राविधिक कम्पनीविरुद्धको अनुसन्धानमा बाधा उत्पन्न गरेको अभियोगमा दुई संदिग्ध चिनियाँ जासुसविरुद्ध अभियोग दर्ता गरिएको बीबीसीले उल्लेख गरेको छ ।

अभियोगपत्रमा चिनियाँ नागरिकहरु गौचुन हे र जेङ वाङले अमेरिकी कानून कार्यान्वयन निकायका अधिकारीहरुलाई प्रलोभन दिई अनुसन्धानको विवरणको माग गरेको जनाइएको छ । उनीहरुले अनुसन्धानको रणनीतिक बैठकको रेकर्ड पनि उपलब्ध गराउन कानून कार्यान्वयन अधिकारीहरुसमक्ष माग गरेको बीबीसीले जनाएको छ ।

यद्यपि ती कानून कार्यान्वयन अधिकारीहरुले अमेरिकाको संघीय अनुसन्धान ब्युरो एफबीआईको तर्फबाट ‘डबल एजेन्ट’ को रुपमा कार्य गरिरहेको जनाइएको छ । प्रलोभनमा पारिएका ‘डबल एजेन्ट’ का रुपमा कार्यरत अमेरिकी कानून कार्यान्वयन अधिकारीहरुले ती संदिग्ध चिनियाँ जासुसहरुको विवरण एफबीआईलाई उपलब्ध गराएका थिए ।

ती संदिग्ध चिनियाँ जासुसहरुले कानून कार्यान्वयन अधिकारीहरुलाई दशौँ हजार डलर बराबरका नगद एवम् गहना र ४१ हजार डलर बराबरको बिट्कोइनको प्रलोभन दिएको बताइएको छ ।

अमेरिकाका महान्यायाधिवक्ता मेरिक गारल्याण्डले पत्रकार सम्मेलन गर्दै उनीहरुविरुद्ध अभियोग दर्ता गरिएको जानकारी दिएका हुन् । अमेरिकी अभियोगपत्रमा कुन चिनियाँ प्राविधिक कम्पनीविरुद्धको अनुसन्धानमा उनीहरुले बाधा उत्पन्न गरेका हुन् भन्नेबारे केही खुलाइएको छैन ।

गारल्याण्डसहितका अधिकारीहरुले पनि उक्त चिनियाँ कम्पनीको पहिचान नखुलाएको बीबीसीले जनाएको छ । यद्यपि अमेरिकी सञ्चारमाध्यमले उक्त कम्पनी चीनमा मुख्यालय रहेको हुवावे रहेको हुनसक्ने जनाएका छन् ।

चीनले आफ्नो मुलुकको न्यायिक प्रक्रियाको गरिमामा आँच पुर्‍याउने कार्य गरेको पनि गारल्याण्डले आरोप लगाएका छन् ।

यता चीनले भने अमेरिकाले चीनको बद्नाम गर्नका लागि झूठको खेती गरिरहेको आरोप लगाएको छ ।