वाशिंटन डीसी– अमेरिकाको अन्तरिक्षसम्बन्धी निकाय नासाले शनी ग्रहको सबैभन्दा ठूलो चन्द्रमा टाइटनमा अन्तरिक्षयान अवतरण गर्ने योजना सार्वजनिक गरेको छ ।

नासाले योजना सार्वजनिक गर्दै टाइटनमा रोबोटिक प्रविधिबाट स्वचालित अन्तरिक्षयान अवतरण गर्ने घोषणा गरेको हो । टाइनटमा अवतरण गर्नका लागि ड्रागनफ्लाई नामक यानलाई सन् २०२६ मा त्यसतर्फ प्रक्षेपण गरिने नासाले जनाएको छ ।

उक्त यान १० वर्षपछि अर्थात् सन् २०३६ भित्र टाइटनको सतहमा अवतरण गर्ने अपेक्षा छ । ड्रागनफ्लाईले करिब ३ वर्षसम्म टाइटनमै अनुसन्धानमा बिताउने जनाइएको छ ।

ड्रागनफ्लाईले त्यहाँको सतहमा रहेको माटोको अवशेषको अध्ययन गरी त्यहाँ जीवावशेष रहे÷नरहेको बारे अनुसन्धान गर्ने नासाले जनाएको छ ।

टाइटन सौर्यमण्डलमा पृथ्वीजस्तै वातावरण भएको उपग्रह भएको मानिन्छ । यसअघि शनीबारे अध्ययन गर्न त्यसतर्फ पठाइएको क्यासीनी अभियानले टाइटनमा पृथ्वीको जस्तै वातावरण रहेकाले त्यहाँ जीवावशेष रहेको हुनसक्ने देखाएको थियो ।