ओसाका– अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिन्पिङबीच जापानको ओसाका शहरमा भेटवार्ता भएको छ ।

ओसाकामा जारी जी २० सम्मेलनको साइडलाइनमा दुई राष्ट्रप्रमुखबीच भेटवार्ता भएको हो । भेटवार्ताका क्रममा दुई मुलुकबीच व्यापारमा पछिल्लो समय देखिएको असहजताका विषयमा छलफल केन्द्रित रहेको अन्तर्राष्ट्रिय सञ्चारमाध्यमले जनाएका छन् ।

दुवै नेताले पछिल्लो समय देखिएको व्यापारिक समस्यालाई समाधान गर्नका लागि व्यापारिक छलफललाई निरन्तरता दिने सहमति बनेको बताइएको छ ।

यसअघि अमेरिकी राष्ट्रपति डोनाल्ड ट्रम्पले थप ३ खर्ब अमेरिकी डलर बराबरका चिनियाँ सामानमा भन्सार बढाउने चेतावनी दिएका थिए । यद्यपि राष्ट्रपति सीसँगको पछिल्लो भेटवार्तापछि भने त्यस्तो भन्सार तत्काल नबढाउने र वार्तालाई निरन्तरता दिनेमा दुबै नेताहरु सहमत बनेका हुन् ।