काठमाडौँ – चाडबाडका समयमा उपभोक्ताको सहजताका लागि गुल्मीमा सुपथ पसल सञ्चालमा ल्याइएको छ । जिल्लाको मुसिकोट नगरपालिका–३ अन्तर्गत वडागाउँमा साना किसान कृषि सहकारी संस्था लिमिटेडले सुपथ मूल्य पसल सञ्चालन गरेको हो ।

उपभोक्तालाई ठगी हुनबाट जोगाउन र सस्तो मूल्यमा वस्तु तथा सेवा उपलब्ध गराउन सुपथ मूल्य पसल सञ्चालनमा ल्याइएको सहकारीका प्रबन्धक विवेक पेमीले जानकारी दिए ।

सुपथ मूल्य पसलसँगै सहकारीले कृषकको उत्पादित कृषिउपजका साथै स्थानीयस्तरमा निर्मित विभिन्न वस्तु तथा सेवाको बिक्री सुनिश्चितता गर्ने उद्देश्यले कोसेली घर सञ्चालनमा ल्याएको छ ।

सुपथ मूल्य पसलबाट न्यूनतम मूल्यमा नागरिकलाई दैनिक उपभोग्य सामान तथा अन्य वस्तु उपलब्ध गराउन सहयोग पुग्ने बताइएको छ । स्थानीयवासीले कुनै पनि वस्तु सजिलैसँग सहकारीमा बिक्री गर्ने र उक्त वस्तु बिक्री गरेबापत सहकारीबाट आफूलाई आवश्यक परेको सामान खरिद गरेर लैजान सक्नेछन् ।

विशेषगरी तरकारी, फलफूल, हस्तनिर्मित उत्पादनको सङ्कलन तथा बजारीकरण, किसानलाई आवश्यक दैनिक उपभोग्य सामग्रीको सहज उपलब्धताका साथै स्थानीय उत्पादन र उत्पादकत्वमा वृद्धि गर्ने कुरालाई प्राथमिकतामा राखी सुपथ मूल्य पसल सञ्चालनमा ल्याइएको वडाध्यक्ष शङ्करबहादुर रायमाझीले बताए ।

सहकारीले सुपथ मूल्य पसलबाट २५ देखि ३० प्रतिशतसम्म छुटमा सामान उपलब्ध गराउने भएको छ । दसैँ तिहार जस्ता चाडपर्वलाई लक्षित गरी रङरोगनका सामग्रीमा २५ देखि ३० प्रतिशत र अन्य खाद्य सामग्री थोक मूल्यमा उपलब्ध गराइएको अध्यक्ष रायमाझीले बताए ।

मुसिकोट नगरपालिकाले निर्माण गरेको कोसेली घरमा सहकारीले पसल सञ्चालनमा गरी सेवा प्रदान गर्न सुरु गरेको हो । नगरपालिकाले गत आर्थिक वर्षमा रु ११ लाख लागतमा उक्त भवन निर्माण गरिदिएको हो । सहकारीले कृषकबाट खरिद गरेका सामग्रीलाई बजारसम्म पु¥याउन केही समस्या देखिएको सहकारीका प्रबन्धक पेमीले बताए ।