काठमाडौँ- फिलिपिन्समा पछिल्लो २४ घण्टामा मात्र कोभिड १९ बाट दुई हजार एक सय ४१ जना सङ्क्रमित भएका छन् । यो समेत गरी न्यहाँ अहिलेसम्म ३९ लाखभन्दा बढी व्यक्तिमा कोभिड १९ को सङ्क्रमण भएको जनाइएको छ ।

साथै त्यहाँ कोभिडका कारण पछिल्लो २४ घण्टामा मात्र ३१ जनाको ज्यान गएको फिलिपिन्सको स्वास्थ्य विभागले जानकारी दिएको छ ।

यो समेत हालसम्म फिलिपिन्समा ६२ हजार चार सय ४७ जनाको कोभिड १९ बाट मृत्यु भएको छ । फिलिपिन्सको राजधानी क्षेत्र मेट्रो मनिलालाई कोभिड १९ ले सबैभन्दा बढी प्रभावित बनाएको छ ।

सो क्षेत्रमा मात्र कम्तीमा पनि एक हजार नयाँ सङ्क्रमित थपिएको बताइएको छ । त्यहाँ गत जनवरीमा एकै दिन ३९ हजार जनामा सङ्क्रमण भएको थियो ।

तर, अहिले भने दैनिक दुई हजार जनाको हाराहारीमा सङ्क्रमित भेटिने गरेका फिलिपिन्सको स्वास्थ्य विभागले जानकारी दिएको छ । हालसम्म फिलिपिन्सको जनसंख्यामध्ये ७२.८ प्रतिशत नागरिकले कोरोनाका विरुद्धको खोपको पूर्ण मात्रा लगाएका छन् ।