काठमाडौँ- युक्रेनी सेनाले रुसी कब्जामा रहेका भूभागलाई मुक्त गर्न प्रत्याक्रमणलाई जारी राखेको छ । प्रत्याक्रमणका क्रममा युक्रेनी सेनाले ठूलो भूभाग रुसी फौजको कब्जाबाट मुक्त गरेको बताइएको छ । हालै युक्रेनी सेनाको कारवाहीपछि रुसी फौज इजियम-खारकिभ मोर्चाबाट पछि हटेको अन्तर्राष्ट्रिय समाचार संस्था रोयटर्सले जनाएको छ ।

हाल इजियम सहर युक्रेनी सेनाको कब्जामा गएको बताइएको छ । रुसी सेनाका लागि यो गत मार्च महिनामा राजधानी किभबाट रुसी फौज फिर्ता भएयताको सबैभन्दा खराब हार भएको अर्थमा टिप्पणी गरिएको छ ।

युक्रेनी पक्षले भने यसलाई ६ महिनाभन्दा लामो समययता जारी युद्धमा ‘नयाँ मोड’ को संज्ञा दिएको छ ।

युक्रेनी सेनाको प्रत्याक्रमणबाट जोगिएर भागेका रुसी सैनिकहरुले ठूलो परिमाणमा गोलीगठ्ठाको सञ्चिती र अन्य सैनिक उपकरणहरु त्यसै छाडेको जनाइएको छ ।

इजियम सहरलाई युक्रेनमा आक्रमण गरिरहेका रुसी फौजले बन्दोबस्तीको आधार शिविरका रुपमा प्रयोग गर्दै आएका थिए ।

यता रुसको सरकारसञ्चालित रुसको तास समाचार संस्थाले रुसी रक्षा मन्त्रालयलाई उद्धृत गर्दै जनाएअनुसार मन्त्रालयले सैनिकहरुलाई त्यस क्षेत्रबाट पछि हट्न निर्देशन दिएको छ । रुसी रक्षा मन्त्रालयले ती सैनिकहरुलाई अन्य स्थानमा तैनाथ हुन निर्देशन दिएको जनाइएको छ ।

खारकिभमा रुसले नियुक्त गरेका प्रशासनका प्रमुखले स्थानीय बासिन्दाहरुलाई रुसतर्फ भागेर ‘ज्यान जोगाउन’ निर्देशन दिएका छन् । प्रत्यक्षदर्शीलाई उद्धृत गर्दै त्यस क्षेत्रमा रोयटर्सले भने रुसतर्फ जाने सडकमा लामो जाम रहेको जनाएको छ ।