काठमाडौं– सत्तारुढ दल नेपाल कम्युनिष्ट पार्टी (नेकपा)ले राष्ट्रिय वृक्षारोपण दिवसको अवसर पारेर आगामी असार १४ गते देशव्यापी वृक्षारोपण गर्ने भएको छ ।

नेकपाले विज्ञप्ति जारी गर्दै आगामी आर्थिक वर्ष २०७६/०७७ लाई वृक्षारोपण वर्षका रुपमा मनाउने समेत निर्णय गरेको छ । हरेक वर्ष असार १४ गतेलाई राष्ट्रिय वृक्षारोपण दिवसका रुपमा मनाइने निर्णय गरिएको नेकपाले विज्ञप्तिमा उल्लेख गरेको छ ।

सरकारले हरेक असार १४ गतेका दिन राष्ट्रव्यापी वृक्षारोपण कार्यक्रम सञ्चालन गर्ने समेत जनाइएको छ । जलवायु परिवर्तन र विश्वमा तापक्रम वृद्धिले प्रतिकूल प्रभाव सिर्जना भइरहेको भन्दै नेकपाले वृक्षारोपण अभियानमा सवैलाई साथ दिन आह्वान गरेको छ ।

त्यस्तै, नेकपाले आफ्ना कार्यकर्ता तथा शुभचिन्तकलाई आफ्ना घर जग्गा वा सार्वजनिक जग्गामा न्यूनतम २ वटा बिरुवा रोप्न, रोपिएका विरुवाको हेरचाह गर्न र यो अभियानलाई सफल बनाउन आह्वान गरेको छ ।