सान डिएगो– अमेरिकामा एप्पलको स्मार्ट घडीले एक रोगीको ज्यान जोगाएको छ ।

अमेरिकाको क्यालिफोर्निया राज्यको सान डिएगो शहरमा रेष्टुरेन्टमा गएका व्यक्तिको स्वास्थ्यमा समस्या आएपछि डाक्टरले आफ्नो एप्पल वाच सिरिज ४ को सहयोगमा बिरामीको शरीरमा भएको आर्टरी आइब्रिलेशन (ए–फिब) पत्ता लगाएका थिए ।

बिरामीको ज्यान जोगाउने डा. टोमी कोर्न सान डिएगो शहरमा नेत्र रोग विशेषज्ञका रुपमा कार्यरत रहेको अमेरिकी सञ्चारमाध्यमले जनाएका छन् ।

ए–फिब भएका व्यक्तिको मुटुको चाल अस्थीर हुने तथा शरीरमा रगतको मात्रा असन्तुलित हुने बताइन्छ ।

एक रेष्टुरेन्टमा भएका बेला बिरामीको स्वास्थ्यमा एककासी समस्या आएपछि सोही रेष्टुरेन्टमा रहेका डाक्टरले एप्पल वाचको प्रयोग गरी बिरामीको शरीरमा मुटुको चाल जाँच गरेका थिए । जाँचपछि उनलाई ए फिब भएको पत्ता लागेको थियो ।

एप्पल वाचमा भएको इसीजीजस्तो प्रविधिले मानिसको शरीरमा मुटुको धड्कन जाँच गर्न सक्छ । र ए फिबबारे नोटिफिकेसन पठाउन सक्छ ।
इसीजी प्रविधि भएको एप्पल वाच ४ हाल युरोप अमेरिका र हंकङमा उपलब्ध छ ।