काठमाडौँ- पाकिस्तानमा सक्रिय लडकु समूह तालिबानले आफूहरुविरुद्ध अनावश्यक आरोप नलगाउन राष्ट्रवादी एवम् धर्मनिरपेक्ष समूहहरुलाई चेतावनी दिएको छ ।

तहरिक ए तालिबान पाकिस्तानमा भनिने पाकिस्तानमा सक्रिय तालिबानले यस्तो चेतावनी दिएको पाकिस्तानबाट प्रकाशित हुने डन अखबारको अनलाइन संस्करणले जनाएको छ ।

तालिबानले सरकारसँगको वार्तामा प्रगति भइरहेको भन्दै यसका कारण देशमा सुधार देख्न नचाहने तत्वहरु उत्तेजित भएको टिप्पणी गरेको छ ।

‘यी मानिसहरु पाकिस्तान शान्त र समृद्ध होस् भन्ने चाहँदैनन् ।’ तालिबानले विज्ञप्ति जारी गर्दै जनाएको छ ।

आफूहरु पाकिस्तानमा ‘वास्तविक शान्ति’ को पक्षमा रहेको जनाउँदै तालिबानले आफूहरु पाकिस्तानविरोधी वा राज्यविरोधी नरहेको स्पष्ट पारेको छ ।

साथै तालिबानले आफूहरु कुनै पनि राजनीतिक वा धार्मिक संगठनको विरुद्धमा नरहेको बताउँदै यस्ता समूहहरुले आफूहरुमाथि लगाउँदै आएको नाजायज आरोप बन्द गर्नुपर्ने चेतावनी दिएको छ ।