काठमाडौँ- अफ्रिकी मुलुक मालीको गाओ क्षेत्रमा रहेको टेसिट शहर नजिकै भएको आतङ्कवादी हमलामा ४२ मालियन सैनिकको मृत्यु भएको छ ।

आतङ्ककारी लडाकुको आक्रमणको जवाफमा सेनाले गरेको प्रत्याक्रमणमा ३९ लडाकु पनि मारिएको माली सरकारले विज्ञप्ति जारी गर्दै जानकारी दिएको छ । भिडन्तमा अरु २२ जना घाइते भएका छन् ।

माली सरकारले जारी गरेको विज्ञप्तिअनुसार माली, नाइजर र बुर्किना फासोको सीमा जोडिएको संकटग्रस्त क्षेत्रमा आक्रमण भएको हो ।

साहारा मरुभूमिको दक्षिणमा पर्ने साहेल क्षेत्रमा पर्ने सीमाक्षेत्रमा कुनै पनि मुलुकको सैनिक उपस्थिती न्यून रहेको बताइन्छ । सोही कारण सो क्षेत्रमा इस्लामिक स्टेट, अल कायदाजस्ता आतङ्कवादी संगठनहरु सक्रिय रहँदै आएका छन् ।

सरकारले आतङ्कवादी हमलाको कडा शब्दमा निन्दा गरेको छ । माली सरकारले इस्लामिक स्टेट इन द ग्रेटर सहारा नामक सशस्त्र समूहले चालकरहित हवाई उपकरण ड्रोन, तोपखाना प्रणाली, विस्फोटक पदार्थ र कार बमहरू प्रयोग गरी हमला गरेको विज्ञप्तिमा उल्लेख गरिएको छ ।

मालीले सन् २०१२ देखि सुरक्षा, राजनीतिक एवम् आर्थिक सङ्कटको सामना गरिरहेको छ । तुआरेग नामक जातीय समुदायको विद्रोह, इस्लामिक अतिवादीको जिहादी आक्रमण एवम् अन्तर–सामुदायिक हिंसाका कारण मालीमा हजारौंको ज्यान गइसकेको छ भने अरु लाखौँ विस्थापित भएका छन् ।