काठमाडौं – सफलताका साथ छैटौँ हप्तामा चलिरहेको फिल्म ‘जात्रै जात्रा’ यो वर्ष सबैभन्दा धेरै कमाइ गर्ने फिल्म बनेको छ । फिल्मले छैटौँ हप्तासम्म आइपुग्दा झण्डै ९ करोडको व्यापार गरेको निर्माण टिमले जनाएको छ ।

पाँचौं हप्तासम्म फिल्मले राजधानीबाट झण्डै ७ करोड बराबरको कलेक्सन गरेको हो भने मोफसलबाट २ करोडको व्यापार गरेको हो । यो ग्रस कलेक्सनमा युट्युबको कमाइ र विदेशबाट कमाएको कलेक्सन जोडिएको छैन । ‘फिल्मले नेपालभरका हलबाट मात्र ९ करोडको कलेक्सन गरेको छ, विदेशको शो हामीले जोडेका छैनौँ,’ निर्देशक प्रदीप भट्टराईले भने ।

यो फिल्म नेपालसँगै अस्ट्रेलियामा पनि रिलिज गरिएको थियो । पछिल्लो समयको सबैभन्दा धेरै कमाइ गर्ने फिल्म बनेको ‘जात्रै जात्रा’ मा प्रदीप भट्टराईको लेखन तथा निर्देशन रहेको छ । फिल्ममा विपिन कार्की, दयाहाङ राई, रविन्द्र सिंह बानियाँ, रविन्द्र झा, वर्षा राउत लगायतका कलाकारको शीर्ष भूमिका छ ।