पाँचथर– पाँचथरको गोपेटार स्थित एनएमबी माइक्रोफाइनान्सकी कर्मचारी सुजाता तामाङको हत्या आरोपी हिलिहाङ ६ निवासी १९ वर्षीय घनेन्द्र लावतीलाई प्रहरीले पक्राऊ गरी विहीबार सार्वजनिक गरेको छ ।

प्रहरीले सदरमुकाम फिदिममा पत्रकार सम्मेलन गर्दै हत्या आरोपी लावतीका साथवाट वरामद गरेको नगद ८१ हजार ७० रुपैंयाँ र हत्यामा प्रयोग भएको खुकुरी पनि सार्वजनिक गरेको हो । लावतीले पैसाकै लोभनमा तामाङलाई बाटो ढुकेर हत्या गरेको प्रारम्भिक अनुसन्धानमा खुलेको जिल्ला प्रहरी कार्यालय पाँचथरका प्रहरी प्रमुख (डिएसपी) नरेन्द्र कुँवरले जानकारी दिए ।

हिलिहाङ ६ भारपा निवासी हत्या आरोपी लावती घर नजिकैको जंगलमा लुकेर वसेको अवस्थामा खुकरी र नगद सहित पक्राउ परेको पनि प्रहरीले जनाएको छ । तामाङको असार ३ गते अपरान्ह चारबजे हिलिहाङ ६ भारपा स्थित सिटे भन्ने स्थानमा हत्या भएको थियो । इलामको माइ जोगमाइ घर भएकी २१ वर्षीय तामाङ एनएमबी माइक्रोफाइनान्स गोपेटारमा प्रशिक्षार्थी सहायकका रुपमा विगत ६ महिनादेखि कार्यरत थिइन् ।

यसैबीच एनएमवि माइक्रो फाइनान्सले हत्या गरिएकी कर्मचारी तामाङको परिवारलाई ६ लाख ५० हजार रुपैंया राहत रकम उपलव्ध गराउने भएको छ । माइक्रोफाइनान्सले तामाङको परिवारका एकजना सदस्यलाई रोजगारी दिने सहमति समेत गरेको सहायक महा प्रवन्धक रामचन्द्र मिश्रले जानकारी दिए ।