काठमाडौँ– मार्भल सिनेम्याटिक युनिभर्सको सुपरहिरो मध्येका एक ‘ब्ल्याक प्यान्थर’ को नयाँ सिरिज ‘वाकान्डा फरेभर’ को सार्वजनिक ट्रेलरले नयाँ इतिहास बनाएको छ। ‘ब्ल्याक प्यान्थर : वाकान्डा फरेभर’ ’को टिजरले दर्शक संख्यामा रेकर्ड कायम गरेको छ । गत शनिबार सार्वजनिक भएको फिल्मको टिजरले २४ घन्टामा १ सय ७२ मिलियन अर्थात् लगभग २१ अर्ब हाराहारी दर्शक पाएको छ ।

२४ घन्टाकै अवधिमा फिल्मले ८ लाख ९३ हजार मेन्सन पाएको छ जसलाई पनि मार्भलका फिल्मको इतिहासमा सर्वाधिक मानिएको छ । फिल्मका मुख्य अभिनेता चाडविक बोसेमनको मृत्युलाई यसको मुख्य कारण मानिएको छ । टिजर सार्वजनिक समारोहका फिल्मको सम्पूर्ण टिमले फिल्म चाडविकप्रति नै समर्पित रहेको बताएका थिए । फिल्मको ट्रेलरमा वाकान्डाको जलीय वातावरण, भविष्यको प्रविधि र सेतो पहिरन लगाएका वाकन्डाहरुको भीडसँगको अन्त्येष्टिजस्तो देखिने तस्वीरसँगै ट्रेलर सुरु हुन्छ ।

केन्ड्रिक लामारको गीत ‘अलराइट’ बाट सुरु हुने ट्रेलरमा ब्ल्याक प्यान्थर चरित्रमा चाहिँ को देखिनेछ ? भन्ने प्रश्न जवाफ स्पष्ट हुँदैन । अघिल्लो श्रृंखलामा ब्ल्याक प्यान्थर सुपर हिरोको रुपमा देखिँदै आइरहेका अभिनेता चाडविक बोसम्यानको निधन क्लोन क्यान्सरको कारण सन् २०२० मा भइसकेको छ। यसकारण नयाँ ब्ल्याक प्यान्थर को बन्दैछन् वा उनको चरित्रलाई कसरी मार्भलको सिनेम्याटिक युनिभर्समा हस्तान्तरण गरिएको छ भन्ने कौतुहलता दर्शक समक्ष छ। रायन कुगलरको निर्देशनमा तयार फिल्ममा लुपिता न्योगो र लेलिता राइटको मुख्य भूमिका छ ।