काठमाडौँ– दक्षिणपूर्वी एसियाली मुलुक फिलिपिन्सले चीनसँग ऋण सम्झौता रद्द गरेको छ ।

नयाँ सरकार गठन भएसँगै तीनवटा रेलमार्ग परियोजना निर्माणका लागि चीनसँग गरिएको ऋण सम्झौता रद्द गरिएको फिलिपिन्सबाट प्रकाशित हुने फिलिपिन डेली इन्क्वाइरर अखबारले जनाएको छ ।

उक्त ऋण पूर्व राष्ट्रपति रोड्रिगो डुटेर्टेको कार्यकालमा उनको महत्वकांक्षी ‘बिल्ड, बिल्ड, बिल्ड’ नामक कार्यक्रमका लागि चीनसँग उक्त ऋण सम्झौता गरिएको थियो ।

नयाँ राष्ट्रपति फर्डिनान्ड मार्कोस जुनियरले चीनको एक्जिम बैंकसँगको उक्त सम्झौता रद्द गरेका हुन् ।

फिलिपिन्सको फिलिपिन नेशनल रेल्वेज, सुबिक क्लार्क रेल्वे प्रोजेक्ट र मिन्डानाओ रेल्वे प्रोजेक्टका लागि सन् २०२१–२०२२ मा ती ऋणका लागि फिलिपिन्स सरकारले चिनियाँ बैंकसमक्ष निवेदन दिएको फिलिपिन्सको यातायात विभाग अन्तर्गतको रेल्वे शाखाका उपसचिव सेजर चाभेजले जानकारी दिए ।