काठमाडौँ- आमिर खानको निर्माण तथा अभिनय रहेको फिल्म ‘लालसिंह चड्डा’ आगामी ११ अगस्टमा रिलिज हुँदैछ । फिल्मको निर्माणका यसको कथासँगै संगीत पक्षले पनि महत्वपूर्ण भूमिका खेलेको छ । फिल्मको नयाँ गीत ‘तुर कलेयाँ’ रिलिज हुँदैछ । यो गीत सबैभन्दा लामो सट्स सिक्वेन्समा छ । पाँच सेकेन्डको यो सट्सलाई खिच्न प्राविधिक टिमलाई झन्डै ४५ दिन लागेको थियो । यो गीतको दृश्य कश्मीरदेखि कन्याकुमारीसम्म खिचिएको छ । गीतले भारतको विभिन्न भौगोलिक परिस्थितिहरू र स्थलका तस्बिरलाई प्रस्तुत गरेको छ ।

टिमका अनुसार यो गीत सुटिङ भइरहँदा आमिरको घुँडामा निकै दुखाई भएको थियो । उनले दुखाई काम गर्ने औषधि सेवन गरेर सुटिङ गरेका थिए । सुटिङभर आमिरले एक फिजियोथेरापिस्टलाई सँगै राखेका थिए । फिल्ममा करीना कपूर खान प्रमुख भूमिकामा छिन् । यो फिल्म हलिउड फिल्म ‘फरेस्ट गम्प’ को हिन्दी रिमेक हो ।

बलिउड अभिनेता आमिर खानले आफ्नो क्यारेक्टरमा हलिउड अभिनेता टम ह्यान्क्सको झल्क देखाउने गरेका छन् । एउटा विषयलाई समातेर सशक्त फिल्म बनाउने शैली टमको छ । फरेस्ट गम्प, कास्ट अ वे , क्याप्टेन फिलीप, द टर्मिनल लगायतका टमको फिल्मको फ्यान विश्वभर छन् । यिनै टमले अभिनय गरेको फिल्म ‘फरेस्ट गम्प’ लाई भारतमा आमिरले रिमेक गरेका हुन् ।  

फिल्ममा आमिरको बाल्य अवस्था देखि वृद्धासम्मको जीवन-यात्रा र बदलिदो संसारलाई देखाइएको छ । एक सामान्य पुरुषको असाधारण यात्रा बोकेको फिल्मका निर्देशन अद्वैत चन्दन र स्क्रिनप्ले अतुल कुलकर्णीले गरेका छन् ।