काठमाडौँ– आकाश श्रेष्ठ अभिनीत फिल्म ‘सम्झना बिर्सना’ आउँदो शुक्रबारबाट प्रदर्शनमा आउँदैछ । फिल्ममा आकाशसँगै पूजा शर्मा र छुल्ठिम गुरुङ, सुनिल थापा लगायतका कलाकारहरू छन् । दार्जिलिङ्गमा छायांकन गरिएको फिल्मलाई निमेष प्रधानले निर्देशन गरेका हुन् । प्रेम र सामाजिक कथावस्तुमा आधारित फिल्म ‘सम्झना बिर्सना’ बाट पहिलोपटक नेपाली फिल्ममा निर्देशकीय डेब्यु गरेका प्रधान फिल्मले नेपाल र दार्जिलिङलाई जोड्ने सेतु बन्ने बताए ।

उनले कला र संस्कृति जोडिएको हुँदा पनि नेपाल आउँदा छुट्टै राष्ट्र आएको आभाष नहुने बताउँदै फिल्मले पनि एकै रहेको सन्देश दिने बताए । नेपाली फिल्म निर्माणमार्फत दार्जिलिङलाई पनि फिल्म उद्योगको रुपमा विकास गर्ने आफूहरूको लक्ष्य रहेको उनले बताए । त्यहाँ नेपालकै संस्कृति र शैली रहेकाले पनि नेपाली कलाकारलाई चिन्ने मात्र नभई फ्यान पनि धेरै छन् । अभिनेता आकाशले पनि दार्जिलिङमा नेपाली फिल्म र कलाकारलाई माया गरेको महसुस गरे । ‘यताका कलाकार उता गएर काम गर्ने सक्नेछन् ।

फिल्मले दुई देशको मित्रता झल्काउँछ र माया पनि,’ आकाशले भने । कन्यामको चिया बगानमा काम गर्ने मजदुरको अवस्था देखाउन देखाउने फिल्ममा बगानमा काम गर्ने मजदुर उचित पारिश्रमिक र मानवीय आवश्यकताबाट समेत बञ्चित भएको कथा छ । अभिनेता आकाशले नेपालभन्दा बाहिरको प्रोजेक्टमा पहिलोपटक काम गरेकाले चुनौती अवश्य रहेको बताए ।

उनले फिल्ममा चिया बगानको मालिकको चरित्रमा अभिनय गरेका छन् । उनी यस किसिमको प्रोजेक्टलाई प्रोत्साहित गर्नु पर्नेमा जोड दिन्छन् । ‘उहाँहरु दार्जिलिङ्गबाट नेपाली फिल्म बनाउनु आउनु भयो । हामीले हाम्रै संस्कृति रहेको ठाउँमा काम गर्दा हाम्रो प्रचारप्रसार पनि उत्तिकै हुन्छ । उहाँहरूलाई फिल्म बनाउन प्रोत्साहन पनि मिल्छ’ आकाशले भने ।